Thursday, May 3, 2012

जडतो तो जीव, लागते ती आस

माझी लेक लहान होती तेंव्हा पासून तिला घरात कुत्रा हवा आहे. आणि flat मध्ये तो पाळायला माझा सक्त विरोध. आपण दिवसांचे कित्येक तास घराबाहेर राहायचे आणि मुक्या प्राण्यांना कोंडून ठेवून त्यांचे हाल करायचे हेच मुळी मला मान्य नाही. शेवटी तडजोड होवून घरात छोटे पक्षी आले. ते घरात गेली ६ वर्षे आहेत. ते त्यांच्याच विश्वात खरंतर जगत असतात, त्यांना वेळच्या वेळी खायला प्यायला द्या बाकी त्यांचे तुमच्याकडे लक्ष ही नसते. तुम्ही घरी या, बाहेर जा त्यांच्या जवळ जा ते दखल पण घेत नाहीत. त्यातले काही एकमेकांशी रक्तबंबाळ होईपर्यंत भांडतात, आणि म्हणून जर त्यांना वेगवेगळ्या पिंजऱ्यात ठेवले तर एकमेकाशी तिथून सतत बोलत राहतात. एक पक्षी त्याच्या जोडीदाराचे खूप लाड करत असे, ती पक्षीण खूप आळशी होती, तरीही त्याचा तिच्यावर खूप जीव होता. दोघे भांडत ही खूप असत ते पाहणे हा एक छान विरंगुळा असे. 


छोटी पिल्ले संस्कृती बाहेर काढत असे, त्यांना हातात घेवून बसत असे. एका रात्री स्वप्न पडलं की एक पिल्लू उडालं म्हणून, सकाळी काही कोणाला त्याबद्दल बोलले नाही. ( अशी स्वप्ने तुलाच कशी पडतात असा कोणी उगाच म्हणू नये म्हणून) आणि खरंच दुसऱ्या दिवशी एक पिल्लू संस्कृतीच्या हातून सुटलं आणि उघड्या खिडकीतून उडून गेलं नंतरचा सारा वेळ संस्कृती रडत राहिली. नंतरचे दोन दिवस त्याच्या साठी टेरेसमध्ये खाणं ठेवून त्याच्या परत येण्याची वाट बघत राहिलो. 

मागच्या वर्षी एकदा पक्षीण मलूल दिसली. आम्ही दोघे ते पाहून अस्वस्थ झालो, कसे बसे तिला मीठ-साखरेचे पाणी पाजून, सतत लक्ष देवून वाचवले तेंव्हा कुठे बरे वाटले. परवा बडोद्याला गेले तेंव्हा पक्षांच्या आवाजाने दुपारी झोपेतून दचकून जागी झाले, वाटले की आमचेच पक्षी ओरडत आहेत, पण नंतर लक्षात आले की ते त्या घराच्या बागेतले होते. गेले २/४ दिवस घरात नव्हतो आणि काय झाले कळलेच नाही, आज सकाळी पाहतो तर तो पक्षी खूप ओरडत होता आणि पक्षीण निपचित पडून होती, तिला वाचवायची कोणतीही संधी न देता....... संस्कृती सकाळ पासून उदास आहे, आम्हा दोघींचेही डोळे सारखे भरून येत आहेत. काही न बोलता संस्कृतीने तो पक्षाला दुसर्या पिंजऱ्यात हलवले, तो पिंजरा साफ केला. कोणत्याही संवादाविनाही किती जीव लागतो याचं हे उदाहरण.

2 comments:

  1. Amchya kade fish tank ahe. Tumhi jase pakshyan badhaal saangitle, agdi tasech anubhav amhaala amchya masyan badhaal yetat. kon havrat ahe, kon garib, kon konla ughich adhun madhun tras deto tar kon kadhi konacha vaatela jaat nahi, kon kasa kuthey lapun zhopto tar konala bara vatat nasel tar kuthey jaato..hey saagla amhi baghat asto, khup majja yete. Tyana bara vatat nasel tar amcha jeev var-khaali hoto, saagle upchaar suru hotat. Tyana bara vatu lagla ki itka ananda hoto, kivva ekada mela tar maanapasun vait vatta. Tasach dusra maasa anta yeto pan ashcharya mhanjey tyachi personality ekdum vegli aste!

    ReplyDelete

हा शब्दपट कसा वाटला, मला जरूर कळवा. आपल्या प्रतिक्रियाच मला लिहिते ठेवतील. या आपल्या प्रतिक्रियेबद्दल मनापासून आभार!